ភ្នំពេញ៖ រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ ក្នុងក្របខណ្ឌទូទាំងប្រទេស លោកស្រីវេជ្ជបណ្ឌិត ឱ វណ្ណឌីន បានបញ្ជាក់ថា គម្លាតនៃការចាក់វ៉ាក់សាំងកូវីដ-១៩ ដូសទី២ សម្រាប់កុមារអាយុពី៣ ដល់ក្រោម៥ឆ្នាំ គឺមានរយៈពេលយ៉ាងតិច២៨ថ្ងៃ ឬ៤សប្ដាហ៍បន្ទាប់ដូសទី១។

លោកស្រីបានប្រាប់ទីភ្នាក់ងារសារព័ត៌មានជាតិថា៖ «ប្រហែលជាឪពុក-ម្តាយ ឬអាណាព្យាបាលមួយចំនួន មានការយល់ច្រឡំ ដូច្នេះហើយ ខ្ញុំសូមបញ្ជាក់ជូនជាថ្មីថា គម្លាតពីដូសទី១ ទៅដូសទី២ ត្រូវមានរយៈពេលយ៉ាងតិច២៨ថ្ងៃ ឬ៤សប្តាហ៍»។

លោកស្រី ឱ វណ្ណឌីន ក៏អំពាវដល់ប្រជាពលរដ្ឋទូទៅត្រូវទៅចាក់វ៉ាក់សាំងដូសជំរុញឱ្យបានគ្រប់ៗគ្នា ដោយការចាក់វ៉ាក់សាំងដូសជំរុញគឺមានគម្លាត ៤ខែពីវ៉ាក់សាំងមុន (៤ខែបន្ទាប់ពីដូសទី២ ទៅដូសទី៣ និងគម្លាត ៤ខែដូចគ្នា សម្រាប់ពីដូសទី៣ ទៅដូសទី៤)។

លោកស្រីបន្ថែមដោយជំរុញដល់ឪពុក-ម្តាយ ឬអាណាព្យាបាល ត្រូវនាំកូន-ចៅ មកទទួលវ៉ាក់សាំងបង្ការជំងឺកូវីដ-១៩ ផងដែរ និងបន្តអនុវត្តវិធានការ ៣ការពារ៣កុំ និងការរៀនរស់ជាមួយវត្តមាននៃវីរុសកូវីដ-១៩ តាមគន្លងប្រក្រតីភាពថ្មី។

គិតត្រឹមថ្ងៃទី១៣ ខែមីនា ឆ្នាំ២០២២ កម្ពុជាបានចាក់វ៉ាក់សាំងដល់ពលរដ្ឋបានប្រមាណ ១៤ ៧៥០ ១០០នាក់ ដែលស្មើនឹងជាង ៩២ភាគរយនៃពលរដ្ឋសរុប ១៦លាននាក់ក្នុងនោះ កុមារអាយុពី៣ ដល់ក្រោម៥ឆ្នាំសម្រេចបានជាង២៦ម៉ឺននាក់ដែលស្មើនឹង៤៣%នៃគោលដៅ ៦១ម៉ឺននាក់ ខណៈការចាក់វ៉ាក់សាំងដល់ពលរដ្ឋដែលមានអាយុពី៥ឆ្នាំឡើងសុទ្ធតែសម្រេចលើសពីផែនការដែលបានគ្រោងទុកទាំងអស់៕